Ստանալ կոնտակտ

Կոլպոսկոպիա. հարցազրույց Նոնա Ֆրոլովայի հետ

2023 Նոյ 18, Շաբաթ

Ի՞նչ է իրենից ներկայացնում կոլպոսկոպիան

Կոլպոսկոպիան արտաքին սեռական օրգանների, hեշտոցի և արգանդի պարանոցի հիվանդությունների  ախտորոշման բարձր տեղեկատվական, մատչելի, միանգամայն անվտանգ մեթոդ է, որն էականորեն բարձրացնում է գինեկոլոգիական տարբեր ախտահարություններով կանանց հետազոտության արդյունավետությունը: Այս մեթոդը միևնույն ժամանաակ ոչ ինվազիվ է և անցավ:

Ինչպիսի՞ սարքավորման օգնությամբ է այն կատարվում

Կոլպոսկոպիան կատարվում է կոլպոսկոպի օգնությամբ, որը բժշկական սարք է, բինոկուլյար մանրադիտակ, որով հնարավոր է բազմակի խոշորացնել հետազոտվող հյուսվածքների պատկերը (5-40 անգամ ): Սարքն ապահովված է հզոր լուսավորմանբ:

Տվյալ հետազոտությունը կատարվում է ստանդարտ գինեկոլոգիական բազմոցում և տևում է 10 րոպեից մինչև կես ժամ: Հեշտոցում գինեկոլոգիական հայելիների տեղադրումից հետո հյուսվածքների մակերեսը մանրազնին ուսումնասիրվում է մանրադիտակով,  պահպանելով 10-15 սմ հեռավորություն՝ անոմալ գոտիների և նորագոյացությունների հայտնաբերման նպատակով:

Կոլպոսկոպիայի տեսակները

Տարբերում են հասարակ կոլպոսկոպիա և լայնածավալ կոլպոսկոպիա: Վերջինի ժամանակ  կիրառվում են մի քանի օպտիկական ֆիլտրեր, և հետազոտվող հյուսվածքները մշակվում են յոդի, լյուգոլի, քացախաթթվի լուծույթներով: Զննելով հեշտոցի պատերը և արգանդի պարանոցի հեշտոցային հատվածը, բժիշկը այն նկարագրում է եզրակացության մեջ, կամ էլ հետազոտման արդյունքը  ներկայացվում է ախտահարված հատվածների տեղակայման և տեսակի  սխեմատիկ պատկերով:

Որոշ կոլպոսկոպներ նախատեսված են միայն տեսողական զննման համար, մյուսները հնարավորություն են տալիս պատկերն արտածել էկրանին, լուսանկարել և տեսագրել զննությունը: Տեսախցիկի կիրառման առավելություններից է այցելուի անմիջական մասնակցությունը հետազոտման ժամանակ:

Ո՞ր դեպքերում է կատարվում այս հետազոտությունը

Կոլպոսկոպիան կիրառվում է ինչպես կանխարգելիչ նպատակով, այնպես էլ՝ պարտադիր կերպով հետևյալ դեպքերում ՛


    1. Հեշտոցի պատերի և արգանդի պարանոցի անզեն աչքով տեսանելի փոփոխությունների հայտնաբերման ժամանակ:
    2. Եթե կատարված բջջաբանական հետազոտության (PAP-քսուք) ժամանակ հայտնաբերվել են բջիջներ, որոնք նորմայում չեն լինում:
    3. Կնոջ մոտ որևէ գինեկոլոգիական խնդիր հայտնաբերելու ժամանակ:
    4. Դիսպանսեր հսկողության հետազոտությունների ժամանակ  այն կանանց մոտ, որոնց մոտ հայտնաբերված է մարդու պապիլոմավիրուս (ՄՊՎ):
    5. Անցկացված բուժման որակի հսկում:

Հակացուցումներ

Հետազոտման հակացուցումներ են հանդիսանում սեռական օրգանների սուր բորբոքային հիվանդությունները, ալերգիկ ռեակցիաները յոդի և քացախաթթվի նկատմամբ:

Նախապատրաստական միջոցառումներ

Ինչպես ցանկացած գինեկոլոգիական հետազոտությունից առաջ, այնպես էլ՝ նախքան կոլպոսկոպիան, անհրաժեշտ է նախապատրաստվել: Միջամտության լավագույն շրջանը դաշտանի ավարտից  2-3 օր հետո է:  Կոլպոսկոպիային նախորդող մի քանի օրերի ընթացքում նպատակահարմար է բացառել սեռական հարաբերությունը, ցնցուղումը և խոնավացնող գելերի օգտագործումը:

Հետազոտության արդյունավետությունը և ճշգրտությունը

Չնայած բարձր տեղեկատվական հնարավորություններին, կոլպոսկոպիան հանդիսանում է ախտորոշման բավականին սուբյեկտիվ մեթոդ, որտեղ մեծ դեր է խաղում բժշկի որակավորումը և արդյունքների ճշգրիտ գնահատումը:

Անրաժեշտ է նշել, որ արգանդի պարանոցի վիճակի  գնահատման համար կոլպոսկոպիան բավարար չէ. Որպես սքրինինգային մեթոդ կիրառվում է PAP-քսուքի հետազոտությունը:  Հետազոտման ալգոռիթմի մեջ նաև մտնում է ՄՊՎ առկայության քննությունը: Եվ իհարկե, արգանդի պարանոցի հիվանդությունների ախտորոշման ոսկե ստանդարտ է հանդիսանում նպատակային բիոպսիան՝ կոլպոսկոպիայի հսկողության տակ:

Հայաստանում PAP-քսուքի թեստը կատարվում է 3 տարին մեկ անգամ:  Կապված յուրաքանչյուր կնոջ հետազոտությունների արդյունքներից, ընտրվում է անհատական բուժման եղանակ և հսկողության ռեժիմ: