Ստանալ կոնտակտ

ԱՄԲ-ն Հայաստանում

2023 Հուն 20, Ուրբաթ

Չբերությունը կարևոր հիմնախնդիր է, քանի որ յուրաքանչյուր ընտանիք ցանկանում է երեխա ունենալ: Այդ խնդիրը բավականին լուրջ է նաև բժշկության համար, թեև ներկայում այդ ասպարեզում բժշկագիտությունը հասել է մեծ հաջողությունների:

Մեր կլինիկայում այսօր կիրառվում են բուժման բոլոր տարբերակները: Տարիների ընթացքում բարձրացել է օժանդակ վերարտադրողական տեխնոլոգիաների որակը, հնարավորությունները: 1980 թվականներին Հայաստանում ամենաընդունված տարբերակը արհեստական սերմնավորումն էր, և այդ տարիներին մեր կենտրոնը համարվում էր

Համաշխարհային կազմակերպության մարդու վերարտադրողական տարածաշրջանային կենտրոն: Առաջին սերմնավորումները կատարվել են այստեղ:

Պրակտիկայում աստիճանաբար ներդրվեցին նորանոր տարբերակներ. 2003-ից ներդրվեց ԱՄԲ-ն: Մոտեցումն այդ մեթոդին Հայաստանում տարբեր էր:

Սկզբնական շրջանում բժիշկները նույնպես վերապահումով էին վերաբերվում, սակայն աստիճանաբար մեթոդը հիմնավորվեց, տվեց իր արդյունքները: Երկար ժամանակ ԱՄԲ իրականացվում էր միայն մեկ կենտրոնում:

Կարևոր է նշել, որ բուժառուների հետ պետք է մինչև վերջ անկեղծ և ազնիվ լինել՝ ճիշտ ներկայացնել հնարավորությւնների այն տոկոսը, որն ունի մեթոդը: Նրանք պետք է վստահեն բժշկին և հավատան հաջողությանը: Ըստ վիճակագրական տվյալների, ժամանակի ընթացքում ԱՄԲ-ն առավել արդյունավետ է դառնում, հնարավորությունները մեծանում են:

Հարկ է շեշտադրել, որ ԱՄԲ իմաստը միայն հղիության կայացումը չէ, այլ նաև մինչև ծննդաբերություն հասցնելը: Ցավոք, հղիության տոկոսն ավելի բարձր է, քան` ծննդաբերության, սակայն կարելի է վստահորեն հայտարարել, որ միջինը 40 տոկոս դեպքերում ավարտվում է ծննդաբերությամբ:

ԱՄԲ-ն ֆինանսապես բավականին ծախսատար միջամտություն է. դա կախված է նրանից, որ անհրաժեշտ է ունենալ հատուկ միջավայրեր, թանկարժեք դեղորայք: Մենք ունենք նաև բավականին թվով բուժառուներ արտերկրից, որոնք մեզ մոտ են գալիս` տեղյակ լինելով մեր հաջողությունների և մատչելի գների մասին: Ուրախ ենք, որ օգնում ենք այդ մարդկանց, և աշխարհի տարբեր երկրներում ունենք մեր ջանքերի շնորհիվ ծնված երեխաներ: