Ստանալ կոնտակտ

Ծննդաբերություն` արտամարմնային բեղմնավորումից հետո

2022 Փետ 22, Երեքշաբթի

Արտամարմնային բեղմնավորումից (ԱՄԲ) հետո բնական ճանապարհով ծննդաբերությունն այժմ արդեն իրականություն է, քանի որ վերարտադրողականության օգնող մեթոդները աստիճանաբար կատարելագործվում են, դառնում ավելի հասանելի:

Դասական ԱՄԲ-ից զատ, արհեստականորեն հնարավոր է կարգավորել դաշտանային ցիկլը, ֆոլիկուլների զարգացումը և ձվազատումը: Կան առավելապես պակաս միջամտությամբ բեղմնավորման տարբերակներ:

• ԱՄԲ` բնական ցիկլում, երբ ընդհանրապես չեն օգտագործվում հորմոնալ պատրաստուկներ: Վերարտադրողաբանը հետևում է ֆոլիկուլի զարգացմանը և անհրաժեշտ պահին այն ենթարկում պունկցիայի: Ստացված ձվաբջիջներն արդեն լաբորատոր պայմաններում միացնում են սպերմատոզոիդի հետ, իսկ 3-5 օր անց ներդնում արգանդի խոռոչ: Այս մոտեցումը շատ քիչ կանանց մոտ է կիրառելի, օրինակ, երբ անպտղությունը կապված է արգանդի փողերի խնդրի հետ, իսկ դաշտանային ցիկլը միանգամայն նորմալ է:
• ԱՄԲ` նվազագույն դրդմամբ. այս մեթոդը նման է դասականին, որի ժամանակ բնական ձվազատումը ճնշվում է, իսկ ձվաբջջի հասունացումն ապահովվում է հորմոնալ պատրաստուկների օգնությամբ: Տարբերությունը հորմոնալ դեղերի փոքր դոզան է:

Այս մեթոդների կիրառումն առավել նպատակահարմար է, քանի որ հորմոնների ազդեցությունն օրգանիզմի վրա նվազեցված է:

Բնական ծննդաբերության և կեսարյան հատման միջև ընտրությունը ԱՄԲ-ից հետո բոլորովին կապված չէ այն բանի հետ, թե ինչպիսի ուղեցույց է օգտագործվել հղիության համար. ընտրության համար նշանակություն ունեն այլ տարբեր գործոններ:

Ծննդաբերության նախապատրաստումը

Մոտավորապես 30 շաբաթականից սկսած հղիին խորհուրդ է տրվում պայուսակ պատրաստել ծննդատուն տանելու համար, որտեղ պետք է լինեն իրեր և՛ երեխայի, և՛ իր համար: Ամղջ հղիության ընթացքում պետք է ունենալ փոխանակման քարտ, որտեղ մանրամասն տեղեկատվություն է նշված հեստացիոն ընթացքի և հղիի ու պտղի առողջության վերաբերյալ.

• արյան և մեզի ընդհանուր հետազոտություն, հեշտոցի քսուքի հետազոտություն,
• արյան կենսաքիմիական հետազոտություն,
• արյան մակարդելիության որոշում,
• արյան խմբի և ռեզուս պատկանելիության որոշում,էլեկտրասրտագրություն,
• Ֆոնոկարդիոտոկոգրաֆիա,
• ՈՒՁՀ՝ պտղի, պլացենտայի, պտղաջրերի, պորտալարի,
• Դոպլերոմետրիա. արյան շրջանառության գնահատում՝ պտղի, պորտալարի և այլն:

Արտաքին զննման, լաբորատոր և գործիքային հետազոտությունների արդյունքում որոշվում է, թե ինչ եղանակով է իրականացվելու ծննդալուծումը:

ԱՄԲ-ից հետո բնական ճանապարհով ծննդաբերությունը

Ծննդալուծման մոտեցումը որոշելու համար հաշվի են առնվում հետևյալ գործոնները.

• մոր տարիքը,
• անպտղության պատճառները,
• հղիության ընթացքի առանձնահատկությունները, առկա բարդությունները,
• պտուղների քանակը,
• պտղի դիրքը,
• ընկերքների և ամնիոտիկ խոռոչների քանակը,
• ուղեկցող հիվանդությունների առկայությունը:

Եթե հղիությունը մեկ պտղանի է, հղին երիտասարդ է, անպտղությունը կապված է արգանդի փողերի բացակայության կամ սպերմայի վատ որակի հետ, ապա, որպես կանոն, պլանավորվում է բնական ծննդաբերություն: Ընդ որում, պտղի դիրքը պետք է լինի գլխային առաջադրությամբ, քաշը` ոչ պակաս 2,5 կգ-ից և ոչ ավելի` 4 կգ-ից, ընկերքը ներքին բացվածքը փակած չլինի:

Հնարավո՞ր են հետագա ծննդաբերություններ:

Այո: Կնոջ օրգանիզմը ծննդաբերությունը ԱՄԲ-ից հետո ընկալում է նույն կերպ, ինչպես բնական հղիությունից հետո: