Ստանալ կոնտակտ

ԱՄԲ` առանց ամուսնու. ինչպե՞ս ընտրել դոնոր

2022 Հուն 05, Չորեքշաբթի

Արտամարմնայի բեղմնավորում (ԱՄԲ) առանց ամուսնու իրականացվում է երեք հիմնական դեպքերում:

• Կինը չունի զուգընկեր: Այդ դեպքում, առաջին հերթին, կատարվում է ներարգանդային ինսեմինացիա, եթե դա արդյունք չի տալիս, հետո միայն իրականացվում է ԱՄԲ:
• Ամուսինն ունի լուրջ գենետիկ հիվանդություն, որի փոխանցման վտանգը կազմում է 25 և ավելի տոկոս:
• Ամուսինը տարբեր պատճառներով բացարձակապես անպտուղ է:

Այս միջամտության համար, նախ, հետազոտվում է կինը: Եթե հայտնաբերվում են խնդիրներ, որոնք կարող են անհաջող ԱՄԲ պատճառ դառնալ, կինը ստանում է համապատասխան բուժում և հսկողություն:

Ինչպե՞ս դոնոր ընտրել

Բոլոր դոնորները լրացնում են հարցաթերթիկ, որտեղ նշվում են.

• ազգային պատկանելիությունը,
• քաշը և հասակը,
• աչքերի և մազերի գույնը,
• ստացած կրթությունը և այլն:

Այս տվյալներից ելնելով կինը կարող է ընտրություն կատարել:

Դոնորական սպերմայով ԱՄԲ առանձնահատկությունները

Նախքան ԱՄԲ, օգտագործվում են պատրաստուկներ, որոնք նպաստում են ֆոլիկուլների  հասունացմանը: Հաջորդ էտապում իրականացվում է ֆոլիկուլների պունկցիա` ՈՒՁՀ հսկողությամբ, հատուկ ասեղի օգնությամբ:  Ստացված նյութից առանձնացվում են ձվաբջիջները: Եթե ամեն ինչ բարեհաջող է ընթանում, հաջորդ օրն կարելի է ստանալ բեղմնավորված ձվաբջիջներ: Մի քանի օր էմբրիոնները հսկվում են, որից հետո դրանցից ամենաառողջները և որակյալներն առանձնացվում են և տեղադրվում արգանդի խոռոչում:

Պունկցիայի 14-րդ օրը կատարվում է խորիոնիկ գոնադոտրոպինի թեստը: Եթե էմբրիոնը իմպլանտացվել է՝ թեստի արդյունքը լինում է դրական:

Դոնորական սպերմայով ԱՄԲ-ն անվտանգ միջամտություն է, քանի որ դոնորը նախապես մանրազննին հետազոտվում է.

• սպերմայի բազմակոմպոնենտային հետազոտություն,
• հեմոկոնտակտային վարակների հետազոտություններ (ՁԻԱՎ, սիֆիլիս, հեպատիտ Բ և Ց),
• Աարյան և մեզի ընդհանուր հետազոտություն,
• արյան կենսաքիմիական հետազոտություն,
• ուրոգենիտալ վարակների հետազոտություն (ցիտոմեգալիա, հերպես վիրուսներ, խլամիդիա, միկոպլազմա, ուրեպլազմա)
• արյան խմբային և ռեզուս պատկանելիության որոշում:

Դոնորը հետազոտվում է նաև մի շարք մասնագետների մոտ (գենետիկ, հոգեբան, թերապևտ, ուրոլոգ): Դոնոր կարող է լինել 18-35 տարեկան տղամարդը, որը չունի վնասակար սովորություններ:

Քանի որ որոշ վարակիչ հիվանդություններ ունեն մինչև 6 ամիս գաղտնի շրջան, սպերման սառեցվում է կես տարի և հետագայում կրկին ենթարկվում վարակների հանդեպ հետազոտման: